Inallukoy ni Department of Energy (DOE) Secretary Sharon Garin dagiti konsyumer a mangusar ti solar energy tapnu makatulong iti panagpababa ti gastos iti kuryente.
Segun kenni Garin, pinalakan iti ahensia ti proseso para iti net metering babaen ti baro a circular.
Naparpartaken iti aplikasyon ken permitting process para kadagiti agpakabit ti solar panel a mangusar laeng kadagiti pagtaengan wenno negosyo da.
Iti agdama, iti Pilipinas ket maysa kadagiti pagilian ti intero a lubong nga adda ti kaaduan a magatang ken maorder a solar equipment.
Kinuna pay ni Garin, malaksid iti panagsalimetmet iti binulan a bill, dakkel met a tulong iti panagusar ti solar energy iti tengnga ti epekto ti El Niño iti supply ti kuryente.
Nupay kasta, ipalpalagip ti DOE nu mangusar ti solar energy ket siguradoen a nasayaat iti pannakaikabit dagiti arawaten ken gumatang laeng kadagiti akreditado a supplier ken liklikan dagiti saan a beripikado a seller iti social media tapnu maliklikan iti aniaman nga aksidente wenno uram.
