BR LA UNION – Ur-urayen dagiti mangngalap idiay Barangay Baroro, Bacnotan, La Union iti agbalin a rekomendasyon ti Bureau of Fisheries and Aquatic Resources (BFAR) Region One ken iti lokal a gobyerno, seknan iti panangipasdek ti fish cages sakbay da a rugyan iti agtaraken ti bangus.
Segun kenni Jessie Cabagbag, presidente ti Fisherfolk Association ti nasao a barangay, mangisayangkat pay nga umuna dagiti maseknan nga ahensiya ken konseho a kas ti Fisheries and Aquatic Resources Management Council (FARMC) ken BFAR iti water sampling tapno maamiris ti kasasaad ti danum ken ti daga iti uneg ti karayan, ken no adda ammonia a mabalin a makaapektar iti panagdakkel dagiti ikan.
Babaen iti resulta ti panagamiris, maikeddeng no anya dagiti paset ti karayan a maitutop para iti panagtaraken ti bangus ken dagiti lugar a masapul a liklikan tapno awan ti agbalin a problema iti panagbiag ken panagdakkel dagiti ikan.
Imbaga ni Cabagbag a dakkel ti maitulong daytoy a programa kadagiti mangngalap, agsipudta babaen ti water sampling, maammoan dagiti lugar a maitutop ken saan a maitutop para iti panagtaraken ti bangus.
Namnamaenda nga agtultuloy iti ipapaay a technical guidance ti BFAR kadagiti bangus grower, nangruna iti nasayaat ken umiso a aquaculture practices.
Impaganetget ni Cabagbag a masapol ti panagtinnulong ti munisipyo ken BFAR iti panagplano tapno maurnos ti pannakaimanehar dagiti fish cage. Kabilang iti umiso a bilang ken distansiya dagiti popokan, ken dagiti tulong kas ti feed subsidy.
Innayon pay ni Cabagbag a saan pay a nat-natiyanan ti danum iti Baroro River. Nupay kasta, masapul latta a tungpalen dagiti mangngalap dagiti ordinansa, nangruna iti karayan, a masapul nga awan ti anyaman a pasdek wenno istruktura a mabalin a makasinga iti panagayos ti danum.
