BAUANG, LA UNION – Balligi a nakadanon idiay South Korea dagiti baro a batch ti Bauang Seasonal Workers kas paset iti agtultuloy a Foreign Seasonal Worker Program iti nagbaetan ti ili ti Bauang ken Taebaek City.
Ti baro a batch ket buklen dagiti 11 a mangmangged agturong idiay Taebaek City tapno agtrabaho ken tumulong iti sektor ti agrikultura sadiay.
Sakbayna ket nangited pay nga umuna ti mensahe ni Mayor Ma. Clarissa “Manang Bong” T. Lee ken impeksa ti panagsuportana.
Ti programa ket insayangkat ti ili kabinnulig ti Department of Migrant Workers kadua ti nadumaduma a sangay tapno mapagtalinaed iti naurnos, natalged, ken organisado a pannakaipatulod dagiti mangmangged a Pilipino.
Inton sumaruno a lawas, namnamaen pay nga adda dagiti sumaruno a batch iti Bauang Seasonal Workers nga agturong idiay Taebaek City.
Iti agdama, umabot ti 81 iti bilang dagiti Bauang Seasonal Workers nga adda idiay Taebaek City ken manamnama a dumanon ti 250 iti bilang dagiti Bauangeñong nga agtrabaho iti nasao a pagilian.
Kabayatanna, napalaos a nagyaman iti lokal a gobyerno ti Bauang iti gobierno ti Taebaek City ken Jeongseon Country iti agtultuloy a panagtalek ken panangited ti oportunidad kadagiti mangmangged ti Bauang, a tumultulong kadagiti mangmangged ti sektor ti agrikultura. (Report by Bombo Danico)
