Imbilin ni Bureau of Immigration Commissioner Joel Viado ti madagdagos a pannakasesante ti BI personnel kalpasan a mabaybay-an na a makatakas ti pugante nga high-profile Korean national.
Maibasar iti kabaroan a CCTV footage ken testimonial evidence, posible nga adda ti napasamak a sabwatan dagiti kameng ti immigration ken ti pugante.
Kinuna ni Commissioner Viado a saan a simple a kinaliway daitoy nu di ket nagkinnunsabo dagiti karaman iti panagtakas, kas maibasar metten kadagiti garaw da iti footage.
Malaksid iti dayta ket nakagun-od da pay ti testimonial evidence a mangpapigsa ti kaso kontra iti personnel.
Gapo iti dayta ket napilaanen kadagiti criminal complaints sadiay Department of Justice ti nasao a kameng ti Bureau of Immigration.
Inkeddeng met ti BI chief nga awan ti ilaksid ti ahensya agingga saan a nadusdusa ken maikulong dagiti amin a responsable iti napasamak tapno saan a tuladen dagiti dadduma pay nga empleyado.
Maipalagip a nakatakas ti pugante a Koreano nga ni Na Ik-hyeon idi kasaruno ti panagdar-ay na ti hearing ti kaso na mainaig ti estafa sadiay QC prosecutor’s office idi Marso 4, aldaw ti Martes.
