BR LA UNION – Namnamaen iti baro ken dakkel a rollback iti presyo dagiti produkto a petrolyo iti sumaruno a lawas.
Daytoy ket agsipudta nagtalinaed a nababa ti presyo ti inangkat a langis iti umuna a tallo nga aldaw ti trading ita a lawas.
Maibasar iti tallo-aldaw a trading manipud Abril 13 agingga 15, iti presyo ti diesel ket namnamaen nga ag-rollback ti P16.80 kada litro, gasolina – P3.20 kada litro bayat a ti kerosene ket P2.60 kada litro.
Nupay kasta, adda pay ti dua a trading days, isunga posible nga agbaliw pay ti maipatungpal a rollback kadagiti produkto a petrolyo ket iyanunsiyo dagiti kompaniya ti langis iti opisyal a presyo inton Lunes ken agbalin nga epektibo inton Martes, Abril 21.
Nu matuloy ti trend, daytoy ti maikadwa a lawas a maipatungpal ti price rollback kalpasan ti lima-lawas nga oil price hike.
