BR LA UNION – Agtultuloy ti panagsagana dagiti opisyales ti Barangay Taberna, Bauang para iti obserbasyon ti UNDAS 2026.
Iti ngamin nasao a barangay ti pakasarakan iti maysa kadagiti kadakkelan a sementeryo iti intero a probinsya ti La Union.
Segun kenni Barangay Captain Dado Buenavista, maysa ti nasao a sementeryo iti lugar da kadagiti kaaduan ti bisita nu madanon ti Piyesta ti Natay.
Iti agdama, agtultuloy ti panagdalus ken panangikkat dagiti basura iti kamposanto tapno makay-ayu a makita dagiti agbisita.
Segun pay iti kapitan, kompleto ti deployment dagiti barangay tanod agraman dagiti opisyal ti barangay, a kabinnulig iti puwersa ti PNP, BFP ken Coast Guard, agraman iti Rural Health Unit ti Bauang.
Kabayatanna, nagpalagip ti kapitan kadagiti agturong iti sementaryo a liklikan ti agitugot kadagiti natitirad a banag, nangruna dagiti patadem, mainom a nasanger, stereo wenno anya pay nga audio equipment, ken playing cards agsipudta amin dagitoy ket maiparit a maiserrek, gaputa maibilang a peligro ken mangdadael iti panangipatungpal ti seguridad.
