BR LA UNION – Pinalagipan ti La Union Police Provincial Office (LUPPO) iti publiko nga agannad nu agturong kadagiti kamposanto bayat nga umas-umasideg ti pannakalagip ti All Saints’ ken All Souls’ Day (Undas).
Segun kenni PMAJ Karol Elizabeth Bacolo, LUPPO Public Information Officer, manamnama nga agdudupudop dagiti umili ken turista kadagiti nadumaduma a kamposanto iti intero a probinsiya tapno lagipen ken sarungkaran dagiti pimmusayen nga ay-ayaten ti biag.
Balakad ni Major Bacolo iti publiko nga agtalinaed a nasiput ken liklikan ti agitugot kadagiti nangina nga alikamen wenno dakkel a kantidad ti kuarta, tapno saan a mabiktima kadagiti kriminal, kas koma dagiti mannitdot ken agtatakaw.
Binalakadan pay ti opisyal dagiti motorista nga agannad iti panagmaneho, nangruna ket namnamaen ti adu a lugan nga agbiyahe wenno agdalyasat iti kalsada.
Impaganetget ni Bacolo kadagiti motorista nga agtulnog kadagiti linteg trapiko, liklikan ti agdardaras, ken kanayon nga agusar iti maitutop a protective equipment, partikular dagiti agluglugan iti motorsiklo.
Kabayatanna, manamnama a paingeten dagiti otoridad ti security measures tapno makatulong a mangtaginayon iti kinatalged ken urnos ti publiko kabayatan ti pannakalagip ti Todos los Santos ditoy probinsiya.
