Inarestar dagiti kameng ti California Highway Patrol ti kumakanta a ni Britney Spears, gapu ti mapapati a panagmanehona bayat nga adda iti impluwensya ti nasanger a mainom.
Dagus met a nawayawayaan ti kumakanta idi kalman ti agsapa.
Nabilin isuna nga agparang iti Ventura County Superior Court inton Mayo 4.
Sigud a naipasango ti kumakanta iti misdemeanor charges idi 2007 kalpasan ti maipagarup nga hit and run iti nakaparada a kotse idiay Los Angeles ngem naareglona daytoy ken binayadan iti danyos.
Napukaw pay ti karbenganna a mangaywan iti dua nga annakna kenni Kevin Federline gapu iti insidente ti nalabes a panaginom ti arak ken adiksion iti illegal substance.###
