BR LA UNION – Pinaneknekan manen ni Carlos Yulo iti laing na iti floor exercise kalpasan a magun-od na ti maika-uppat a gold medal iti nasao nga apparatus, iti naisayangkat nga Artistic Gymnastics Asian Championships idiay Jecheon, Korea manipud June 5 agingga June 8.
Nakagun-od ni Yulo ti 14.600 points iti final tapno abaken ni Milad Karimi ti Kazakhstan nga addaan ti 14.400 points bayat a ni Moon Geonyoung ti South Korea ket nakailista ti 14.033 points para iti bronze.
Daytoy ti maika-uppat a gold medal ni Yulo ken agdama nga Olympic champion iti floor exercise.
Iti pakabuklan, addan ti uppat a medalya ni Yulo iti nasao a kompetisyon, gold medal para iti floor exercise (Hunyo 7), bronze iti individual all-around (Hunyo 6), ken saggaysa a bronze iti vault ken parallel bars ita nga aldaw ti Domingo.
Nagturpos pay ni Yulo iti maika-pito a pwesto iti horizontal bar finals babaen iti score a 12.000.
Kabayatanna, sumaruno a saganaan ti filipino icon iti pannakipaset na iti World Artistic Gymnastics Championships idiay Jakarta, Indonesia inton October 19 to 25, 2025.
