BR LA UNION – Impaganetget ni Palace Press Officer Undersecretary Claire Castro a responsibilidad ni Rep. Leandro Leviste a paneknekan dagiti alegasyonna mainaig iti makunkuna a “Cabral’s files,” kalpasan a kinaritna ni Castro a maipagarop nga iberipika kenni Department of Public Works and Highways Secretary Vince Dizon iti mapapati nga “insertions”.
Segun kenni Castro, saan nga obligasyon ti Malacañang wenno siasinoman iti gobyerno a paneknekan dagiti dokumento nga ibagbaga a mismo ni Leviste nga ikotna.
Impaganetget ni Castro a ni Leviste ti nangirugi a nangipasindayag kadagiti nasao a dokumento, isunga responsibilidadna a paneknekan ti kinapudno dagitoy.
Innayonna a saan a masigurado no pudno dagiti dokumento a dak-dakamaten ni Leviste wenno binaliwan wenno parbo laeng a dokumento.
Imbaga ni Castro a sakbay nga agibato iti akusasyon kontra iti siasinoman, rumbeng a mangipakita nga umuna ti nalawag ken beripikado nga ebidensiya.
Binagaan ni Castro iti agtutubo a kongresista a daytoy ket bukodna nga alegasyon ken saan a rumbeng nga ipasa iti sabali, ti responsibilidad a panangpaneknek.
Inlawlawag pay ti Palace official a ti umno a proseso ket ti panangsuporta kadagiti alegasyon babaen ti konkreto nga ebidensiya, imbes nga ibilin wenno obligaren dagiti dadduma nga opisyal a mangisayangkat iti beripikasyon.
