Iggem ti pamilya ni sigud a Department of Public Works and Highways (DPWH) Undersecretary Maria Catalina Cabral iti cellphone-na, iti laksid ti pammilin ti Office of the Ombudsman nga ipasidong daytoy iti kustodiya dagiti otoridad idiay Benguet.
Pinasingkedan ni Police Col. Lambert Suerte, hepe ti Benguet Police Provincial Office, a saan nga naala dagiti personnel iti nasao a gadget manipud iti pimmusay nga opisial.
Nasarakanda ni Cabral a saanen nga agang-anges kalpasan a matnag iti derraas idiay Kennon Road, Tuba, Benguet idi kalman.
Sakbay ti pasamak, maysa isuna kadagiti maim-imbestigaran gapo iti maipagarup a paset na kadagiti maanomalya a flood control projects ti ahensia.
Imbilin ti Ombudsman a rumbeng a salimetmetan iti cellphone ken dadduma pay a gadgets ni Cabral kas posible nga ebidensia kadagiti kaso nga maim-imbestigaran.
Iti agdama, saan a masinunuo no kasano a masigurado dagiti imbestigador iti integridad dagiti datos nga adda iti nasao a gadget nga iggem ti pamilya.
Nanglukat iti nasao a pasamak ti nalawlawa a diskusion maipapan iti chain of custody ti ebidensia kadagiti kaso nga addaan pakainaiganna kadagiti opisial ti gobierno.#
