Pimmusay iti maysa a police official kalpasan a naaksidente ti man-manehuenna a kotse iti kawatiwatan ti national highway a sakopen ti Barangay Guinabang, idiay ili ti Bacnotan, La Union.
Napasamak ti aksidente idi malem ti Martes Santo, Abril 4, 2023.
Nabigbig ti pimmusay a biktima a ni Police Major John Maynard Macusi, 32-anyos, residente ti Barangay Old Central, Sudipen, La Union ken agdama nga Officer-In-Charge ti Tubao Municipal Police Station.
Maibasar iti initial nga imbestigasyon ti Bacnotan Police, maipagarop a na-lost control ni Macusi iti man-manehuen na a kotse, a nakaigapuan ti pannakaidungpar na iti nakasinnabatna a SUV, ken minaneho ti managan Avelino Ledda Anastacio Jr, 29-anyos residente ti Barangay Nalasin, Balaoan La Union.
Ni Major Macusi ket agturong iti abagatan a direksiyon bayat a ni Anastacio ket agpa-amianan a direksiyon.
Gapu iti kapigsa ti impact ti aksidente, nagsagaba ti nakaru a pannakadundunor ti bagi ti opisyal ken naideklara a dead-on-arrival idiay Bacnotan District Hospital.
Kabayatanna, adda met iti natalged a kondisyon ni Anastacio agraman iti dua a pasahero na.
Naulila ni Major Macusi iti asawa na ken dua nga anak.
Agtultuloy ti imbestigasyon dagiti otoridad iti nasao nga insidente.
