BR LA UNION – Nababalaw iti China gaputi gandat a pananglapped na iti screening ti dokumentaryo ti Pilipinas idiay West Philippine Sea iti maysa a film festival idiay New Zealand.
Immunan a kinumpirma ti Chinese Consulate General idiay Auckland iti maysa nga statement nga imbinglay ti Doc Edge, a kiniddaw na idi Biyernes, July 4 iti festival organizers a kanselaren ti panangipabuya iti Filipino documentary a “Food Delivery: Fresh from the West Philippine Sea”.
Maibasar iti email manipud Chinese Consulate, nakailanad a ti nasao a dokumentaryo ket napunno ti disinformation ken false propaganda a maipagarop nga agserserbi a political tool ti Pilipinas tapno ilungalong iti saan a lehitimo a claims iti pagin-innagawan a kabaybayan.
Kinuna na nga iyaw-awan ti nasao a dokumentaryo iti publiko ken mangipapaay ti biddut a mensahe iti internasyonal.
Ngem imbaga ni Doc Edge general manager Rachel Penman a kinedkedan da iti request ti Chinese Consulate agsipudta takderan da iti amin a filmmakers.
Immunan a nangabak ti nasao a dokumentaryo iti direksiyon ni Baby Ruth Villarama ti Tides of Change Award iti sidong ti Best Festival Category iti Doc Edge film festival 2025 idiay New Zeland a maibilang a maysa a napateg a panangabak para iti pagilian.
Iti nasao a dokumentaryo, naipamatmat iti maritime conflict iti baetan ti Pilipinas ken China a naipabuya iti world premiere idi June 30 idiay Auckland kas paset ti nasao a festival.
Iti maysa nga statement, takderan ti Armed Forces of the Philippines (AFP) dagiti adda iti likod ti award-winning documentary tapno depensaan ti kinapudno ken soberaniya ti pagilian
Nangipeksa ti suporta iti AFP iti panangikagumaan a mairakurak dagiti reyalidad a sangsangwen dagiti mangngalap a Pilipino ken maritime defenders idiay West Philippine Sea.
