Imbutaktak ti Presidential Anti-Organized Crime Commission (PAOCC) a ti mastermind ti nabiit pay a panagkidnap ti 14-anyos nga international student sadiay siyudad ti Taguig ket isu metlaeng ti suspek iti pannakapukaw dagiti gangganaet ditoy pagilian.
Segun kenni PAOCC spokesperson Winston Casio, makikokoordinar dan kadagiti sumagmamano nga embahada kadagiti naglabas a tawen mainaig kadagiti insidente ti panagkidnap nga aramid ti agnagan ti Wang Dan Yu a pagaammo pay kas Bao Long, a makuna a lider ti notorious a kidnapping syndicate a karaman pay kadagiti Philippine Offshore Gaming Operators (POGOs).
Mainaig iti daitoy ket nakatuding nga ibinglay ti PAOCC amin a kasapulan nga impormasyon iti Philippine National Police (PNP) ken Department of Interior and Local Government (DILG) mainaig ti nasao nga suspek.
Maipalagip nga immunan a dinakamat ti DILG ni Wang Dan Yu kas suspek ti pammaltog ti maysa pay a Chinese national iti hotpot restaurant sadiay Makati city idi Oktubre napalabas a tawen.
