LA UNION – Iti 2023 Annual Audit Report ti Commission on Audit (COA) para iti Department of Public Works and Highways (DPWH), agpar-parang nga umabot ti P783,529,617.36 nga advance payments kadagiti kontratista ket saan pay a nabawi wenno naisubli agingga iti maudi a paset ti tawen.
Ti nasao a pondo ket nailatang iti 353 a proyekto nga imprastraktura a completed, terminated, ken agur-uray ti terminasyon ti kontrata.
Imballaag ti COA, a panaglabsing daytoy iti Revised Implementing Rules and Regulations (IRR) ti RA No. 9184 ken posible a pakaigapwan daytoy ti dackel a pukaw iti pondo ti gobyerno.
Kabilang dagiti kangrunaan a nadiskubre ti COA ket iti sumaganad:
- ₱388 milyon para iti 253 a nalpas a proyekto
- ₱351.7 milyon para iti 94 a terminado a proyekto
- ₱43.7 milyon para iti innem a proyekto nga agur-uray ti terminasyon
Dagiti naipalospos nga advance payments ket mangipak-pakita ti pannakapaay a kissayan iti bayad a 15% reduction manipud iti periodic progress payments dagiti kontratista agingga a naan-anay a mabayadan iti advances.
Kabilang met dagiti isyu a nadiskubre iti findings, ket iti pannakapaay nga i-forfeit ti advance payment bonds iti kanito a ma-terminate ti kontrata ken kurang ti monitoring ken umiso a panagkissay manipud iti billing ti kontratista.
Saan pay a kumpleto iti accounting records ken matantantan a panagproseso iti claim dagiti kontratista.
Dagiti saan a nabawi nga advances ket mangparnuay ti dackel a kantidad ti pondo a saan a mausar ti gobyerno para iti dadduma a napapateg a proyekto.
Gapuna, insingasing ti COA a kiddwen iti nasapa a panagbayad kadagiti kontratista wenno i-forfeit iti inlatang da a bonds.
Nasken a rugyan iti legal nga aksyon kontra kadagiti agkedked a mangisubli ti advances.
Nairut a maipatungpal iti panangsurot iti IRR ti RA No. 9184 ken dagiti allagaden ti DPWH iti panagisubli ti advance payments.
Rumbeng a pasayaaten iti monitoring mechanisms tapno masiguro ti naipanawen a panagkissay ti advances manipud iti progress billings.
Nasken a maipatungpal dagiti probisyon ti kontrata a mangipalubos ti panagkissay ti advances manipud kadagiti claim iti dadduma pay nga agdama a proyekto nga adda kapada a kontratista.
Ket iti siasinuman a mapaay a sumurot iti proseso ket maiparbeng a mapatawan ti administrative sanction.
Kabayatanna, impadamag ti DPWH nga ikag-kagumaan da a sungbatan iti isyu, kabilang iti panangiyetnag ti demand letters kadagiti kontratista, pannaki-tinnulong iti regional offices tapno ipatungpal iti koleksyon, ken panangiwayat iti legal a remedyo.
Iti likudan dagiti nasao nga addang, impaganetget ti COA a kasapolan ti mas nair-irut a panangipatunpal ken panangsurot iti proseso, tapno maiklikan a dumackel dagiti saan pay a naisubli nga advance payments.
(data source from COA 2023 Annual Audit Report for DPWH)
