LA UNION – Siniguro ti Commission on Elections a saan a makalusot dagiti botante a kayatna a maaddaan ti multiple registration tapno makabotos iti sabali a presinto iti masungad nga eleksiyon.
Segun kenni Comelec spokesperson Atty Rex Laudiangco, banbantayan ti komisyon iti posibilidad a panagraira dagiti nasao a botante wenno maaw-awagan a flying voter.
Gaputa agus-usar metten kunana ti komisyon ti automated fingerprint identification system iti panagpareshistro, mabantayan a naimbag ti tunggal agparehistro nu addaan dan ti record iti komisyon.
Nu madetermina nga addan ti sigud a record ti maysa a botante manipud iti sabali a presinto, otomatiko a makanselar iti applikasyon dagitoy.
Segun kenni Laudiangco, nakalusot daytoy iti napalabas nga eleksion ken nasurok 500,000 double ken multiple entries iti namonitor da, maibasar iti insayangkat nga imbestigasyon ti komisyon.
Maysa pay kadagiti banbantayan ti komisyon ket iti posibilidad a panagakop dagiti kandidato ti sumagmamano a botante manipud iti maysa a lugar ken agpa-rehistro dagitoy iti lugar a pagtarayan ti nasao a kandidato.
Ngem segun kenni Laudiangco, a babaen ti baro a sistema ti komisyon, napartak laengen a matunton ti Comelec ken nakasagana daytoy a mangidatag ti election offence kontra kadagiti kandidato ken uray kadagiti agpapa-aramat a botante.
