Impaganetget manen ti Commission on Elections (COMELEC) nga awan ti napasamak a dagdag-bawas iti agtultuloy a panagbilang dagiti botos ita a 2025 midterm elections.
Babaen ti press conference sakbay ti panagturong ti National Board of Canvassers idiay The Tent City, Manila Hotel ket inlawlawag ni Comelec Chairman George Erwin Garcia a saan a nadalusan ti programa dagiti dadduma nga entidad karaman ti media isu ket mabalin a nadoble ti bilang manipud kadagiti presinto.
Innayon na pay a real time iti ipakpakita a resulta ti Comelec iti website da ken saan a mangir-iruar kadagiti ranking. Kinunana a ti inaramid da a panangirurar ti bilang dagiti botos ket paset ti panagbalin a transparent ti komisyon tapno dagos a maamuan ti publiko.
Kinunana pay ni Garcia a nakapatang nan dagiti mangir-iruar ti partial/unoffical result a dalusan ti programme da tapno saan a madoble ti maipatpatulod ti tunggal presinto.
Inlawlawag pay ti opisyal a nu anya ti maipatpatulod ti tunggal presinto kalpasan ti panagbobotos ket saan nga otomatiko nga human-readable data wenno dagos a mabasbas a dagiti datos.
