Birukan pay nga umuna ti Commission on Elections (COMELEC) iti pondo para ti posible a pannakaisayangkat ti special elections idiay 4th District ti Cavite kasaruno iti pannakabakante iti puesto ni Cavite 4th District Rep. Kiko Barzaga.
Iti mensahe nga impatulod ni COMELEC Chairman George Erwin Garcia iti Bombo Radyo Philippines ket kinunana nga awan iti nakailatang a budget iti poll body para ti nasao nga eleksyon agsipud ta karaman iti sagsaganaan ti komisyon ket dagiti mapasamak a panagbobotos ita a tawen.
Inlawlawag ni Garcia a segun iti linteg ket kasapulan a mangisayangkat ti special elections para ti nabakante a puesto ti Kamara.
Segun pay iti COMELEC chairman, ti special elections ket nasken a maiyuswat iti saan a bumaba ti 60 nga aldaw ken saan a lumagpas ti 90 nga aldaw manipud iti opisyal a pannakaideklara iti nabakante a posisyon.
