Nakasagana ti Commission on Elections (COMELEC) a mangipaulog iti resolusion para kadagiti agtarigagay kina-senador a tumabuno kadagiti debate.
Espesipiko dagiti iyuswat dagiti media organization ken dadduma pay a grupo tapno masigurado ti agpapada a pannakaisarang dagiti 66 a kandidato.
Segun kenni Comelec Chairman George Erwin Garcia, saanda nga idauluan ti debate ngem kayatda a siguraduen a patas daitoy para iti amin.
Ipalpalagip laeng ti COMELEC a rumbeng a suroten dagiti kandidato dagiti guidelines no mangipaulog dagitoy gapu ta planoda ti mangipataw iti dusa no saanda a suroten ti polisia.
Indagadag pay ni Garcia kadagiti media outfits a siguraduen a karaman dagiti kandidato no planoda ti mangorganisar iti debate para iti senatorial bets para iti 2025 midterm elections.
Maipalagip nga idi 2022, inawagan ni Garcia ti Kongreso a mangipasa iti linteg a mangikalikagum kadagiti kandidato ti kina-presidente a tumabuno kadagiti debate tunggal eleksion ken madusa dagitoy no saanda nga umatendar.
