Binallaagan ti Commission on Elections (COMELEC) dagiti kandidato a saanda nga usaren ti Traslacion 2025 tapno nasapa nga agkampania.
Segun kenni Comelec Chairman George Erein Garcia, saan a rumbeng a gundawayan dagiti kandidato ti nadakamat nga aktibidad a manamnama a pakisalipan dagiti minilion a deboto.
Innayon ni Garcia, nasken a maited ti nasao nga aldaw kadagiti deboto ken saan a gundawayan.
Segun kenkuana, maysa laeng nga aldaw ti kampania no idilig iti 90 nga aldaw para kadagiti national candidates ken 45 nga aldaw para kadagiti local candidates, isu a rumbeng a panunoten daitoy ti kandidato.
Nakasagana ti Comelec a mangaramid kadagiti maitutop nga addang tapno madiskualipika dagiti kandidato a mamagbalin iti piesta ni Poong Jesus Nazareno a lugar ti kampania.
