Imbatad ti Commission on Elections (Comelec) a nakasagana da a sangwen ti aniaman nga imbestigasyon mainaig ti kallabes nga eleksyon.
Segun kenni COMELEC Chairman George Erwin Garcia, nabayag dan a nasungbatan dagiti pammabasol ken akusasyon kontra iti ahensya.
Inlawlawag na a nagbalin a natalged, pudno, ken nakapia ti naangay nga eleksyon ken pinaneknekan pay daitoy dagiti sabali a grupo kas iti Parish Pastoral Council for Responsible Voting (PPCRV), European Union, sumagmamano nga embahada, simbaan, pagadalan, ken dadduma pay nga organisasyon.
Innayon pay ti opisyal a dagiti maisupadi nga opinyon ket paset ti maysa a pagilian nga addaan iti demokrasya.
Ti waragawag ni Garcia ket kasaruno ti reklamo dagiti sumagmamano a grupo a nangipadanon sadiay National Bureau of Investigation (NBI) tapno paimbestigaran ti Comelec ken kadagiti kakadua ti commissioner mainaig kadagiti nagbalin a problema ti 2025 Midterm Elections.
Karaman kadagiti nagreklamo ket tao manipud simbaan, politiko, sigud nga opisyal ti Philippine National Police (PNP), ken dadduma pay a sektor.
