Pagpalpalawagen ti Commission on Elections (COMELEC) dagiti sumagmamano a kandidato ita a midterm elections nu apay a saan da a rumbeng a mapilaan ti kaso nga adda pakainaigan na ti vote-buying ken abuse of state resources a mabalin a rason ti pannakadiskwalipikar da.
Karaman kadagitoy nga kandidato ket ti agassawa nga Ernillo Villas ken Edna Cantos Villas nga agpada nga agtarigagay ti kina-Mayor ken Bise Mayor idiay Bulalacao, Oriental Mindoro.
Kayat nga ipalawag ti poll body ti pannakairaman ken panangimando da ti panangiwaras ti duaribo a pisos babaen ti work program ti Department of Social Welfare and Development (DSWD).
Mainaig iti daitoy ket napatulodan ni re-electionist Congressman Emerson Pascual ti Nueva Ecija iti show-cause order tapno ilawlawag ti panagkiddaw na ti suporta nga ibotos isuna kasukat ti panangiwaras ti kwarta idiay ili ti Gapan.
Kabayatanna, nabiit pay idi nakaawat ti reklamo iti Comelec mainaig met kenni Abraham Mitra gapo iti panangiwaras na ti limited free tickets ti maysa a movie screening.
Segun iti komisyon, kasapulan a depensaan ni Mitra ti bagbagi na nu apay a saan a rumbeng nga maikonsidera ti inaramid na kas vote-buying.
Innayon pay ni COMELEC Chairman Garcia a dagitoy a show-cause orders nga inruar ti poll body ket saan met a kayat na a satwen a madiskwalipikaren wenno makasoanen dagiti kandidato nu di ket gundaway da laeng tapno idepensa ti bagbagi da manipud iti publiko.
