BR LA UNION – Impaganetget ni Philippine Coast Guard Spokesperson for the West Philippine Sea Commodore Jay Tarriela, a tik-tikawen laeng ti chinese embassy ditoy Pilipinas iti publiko kalpasan a nai-tag iti nabiit pay a social media post na ken sungbatan dagiti press release seknan iti isyu idiay West Philippine Sea.
Segun kenni Tarriela, sung-sungbatanna laeng dagiti isyu nga adda pakainaiganna iti ar-aramiden a panaglabsing ken agresyon ti China kontra iti Pilipinas, partikular iti uneg ti West Philippine Sea.
Mamati ti opisyal a paset laeng daytoy iti istratehiya ti chinese embassy tapno kontraen dagiti addang ti Philippine Coast Guard nga ipaka-ammo kadagiti Pilipino ken iti international community ti pudno nga impormasyon seknan iti sitwasyon iti kabaybayan ken tapno bingayen ti opinyon ti publiko.
Mainaig ti daytoy, kwinestiyon ni Tarriela iti inaramid nga statement ni Professor Clarita Carlos, national security adviser, a maipagarop a rubrub-rubanna ti isyu iti China ken saan nga urayen a lumaban ti nasao a pagilian.
Impaganetget ni Tarriela, saanna a personal a laban daytoy ngem ketdi paset ti pagrebbengan na kas opisyal.
Kinuna na a responsibilidad na nga ipaka-ammo iti publiko dagiti insidente ti agresyon ti Chinese Maritime Forces iti uneg ti Exclusive Economic Zone ti Pilipinas.
Innayon na pay a ti rumbeng a kondinaren ket iti ar-aramiden a panang-bully ti Chinese Maritime Forces kadagiti Pilipino, Philippine Coast Guard, ken Armed Forces of The Philippines idiay West Philippine Sea.
