Opisyalen a impasidong ti Commission on Elections (Comelec) En Banc iti direkta a kontrol ti intero a Cotabato City ken iti ti Maluso idiay Basilan ita nga aldaw ti Lunes, Setyembre 14, 2026, kagiddan iti panagrugrugi ti kaunaan a Bangsamoro Parliamentary Elections.
Naipatungpal ti addang kasaruno dagiti serye ti kinaranggas ken dadduma pay nga insidente kadagiti dua a lugar sakbay iti panagbobotos.
Karaman kadagiti insidente ket ti panagpaputok iti paltog ken panangpabettek ti granada idiay Cotabato City a nakatayan ti tallo a tattao ken nakadunoran ti sabali pay, kasta met dagiti ‘harassment’ a naipadamag idiay Maluso, Basilan.
Iti sidong ti Comelec Control, direktan nga imanehar iti komisyon ti panangimaton ken seguridad kadagiti lugar babaen iti pannakibinnulig kadagiti kameng ti Philippine National Police (PNP) ken Armed Forces of the Philippines (AFP).
Mabalin met a sukatan ti Comelec dagiti lokal nga opisyal wenno security personnel ken direkta nga ipatungpal iti linteg ti trapiko ken gun ban tapno mapagtalinaed iti kinaannayas iti eleksyon.
Impasiguro ni Comelec Chairman George Erwin Garcia nga agtultuloy iti proseso ti panagbotos laksid iti Comelec Control ken agtaltalinaed a kontrolado dagiti otoridad ti sitwasyon kadagiti polling precincts.
