LA UNION – Impaganetget ni C/Supt. Romulo Sapitula, regional director ti Police Regional Office-1, a sumursurotda laeng iti pammilin manipud ti national headquarter ti Philippine National Police (PNP) ken ni Pangulo Rodrigo Duterte maipapan iti panang-pullout iti police security detail dagiti incumbent elected officials idi napalabas nga eleksyon ti barangay.
Iti pannakiuman ti Bombo Radyo kenni C/Supt. Sapitula kas sungbat iti privilege speech ni La Union 2nd Representative Sandra Eriguel idiay Kongreso, kinunana a saan nga entitled a maipaayan ti police security detail ti pimmusay a mammanday linteg a ni Dr. Eufranio Eriguel gapu ta saan met daytoy nga incumbent official ken indentified pay isuna nga adda ti listaan iti narco-politics ni Pangulo Duterte.
Sigun pay ti heneral, ni Congresswoman Sandra ken ti anakna a ni Agoo, La Union Mayor Stefanie Eriguel laeng ti temporaryo a naikkatan iti police security detail kas sungbat iti pammilin ni PNP Chief Director General Oscar Albayalde gapu ti kinapateg ken kasapulan dagiti pulis iti panangbantay idi napalabas nga eleksyon.
Innayon pay ni C/Supt. Sapitula, nga isuda a pulis ket sinanay iti gobyerno tapno pagserbiyan dagiti umili ken saan laeng iti sumagmamano a personalidad wenno maysa a pamilya laeng.
Immuna iti daytoy, iti privilege speech ni Rep. Sandra idiay Kongreso ket saanna a nailemmeng ti sakit iti nakem ken panangpabasol kadagiti sumagmamano nga opisyal ti pulisya maipapan iti pannakapapatay ti asawana a ni sigud Congressman Eufranio Eriguel.
