BR LA UNION – Kinumpirma ti pulisya idiay Prague nga “aware” da iti sitwasyon ti Pilipino a ni Zaldy Co a mairam-raman iti kaso ditoy Pilipinas, ngem saan da pay a nangipaay ti detalye seknan iti pannaka-arestar ti sigud nga Ako Bicol Party-List Representative, ngem mabalin kunada ti maki-koordinar iti Ministry of Interior.
Immuna nga inyanunsyo ni President Ferdinand Marcos Jr. ti pannaka-arestar ni Co idi Huwebes, Abril 16, ken imbaga na a naki-koordinaren ti gobyerno iti Czech government tapno masiguro a masurot iti legal process ken napaspas ti pannakaisubli na ditoy Pilipinas.
Maibasar iti report, maysa a press officer ti Czech police iti nangibaga nga ur-urnosen dan iti impormasyon seknan iti insidente sakbay a mai-refer iti nasao nga ahensya para iti opisyal a waragawag.
Kabayatanna, nakaulimek pay laeng iti Philippine Embassy idiay Czech Republic kadagiti detalye ti pannaka-aresto ni Co ken nu mangipaay daytoy ti consular assistance iti sigud a mammanday linteg.
Ni Co ket sumangsango iti kaso a graft ken malversation kadwa na ti 15 pay a dadduma seknan iti maipagarop a substandard a P289-million flood control project idiay Naujan, Oriental Mindoro.
Maipalagip nga idi Enero, naipadamag a simmango ni Co iti Stockholm County Administrative Board idiay Sweden seknan iti petisyon na idiay Korte Suprema.
Iti agdama, maur-uray iti opisyal a kumpirmasyon manipud Czech authorities bayat nga agtultuloy ti koordinasyon iti baetan dagiti maseknan nga ahensya ti Pilipinas ken Czech Republic.
