LA UNION – Implastar ti sigud a Chief Justice ti Korte Suprema a ni Antonio Carpio dagiti addang a mabalin nga aramiden ti Pilipinas kalpasan ti panang-hijack ti Chinese forces kadagiti bangka ti Pilipinas idiay Ayungin shoal iti West Philippine Sea idi Lunes, Hunyo 17.
Inrekomenda ni Carpio a sukatan iti presensiya ti tropa ti pagilian idiay Ayungin shoal, manipud military agturong iti civilian ken mangipasdek ti lighthouse nga i-operate ti Philippine Coast Guard (PCG) iti nasao a shoal, mangimuntar ti substation ti coast guard sadiay ken mangipasdek ti research center iti UP.
Inlawlawag ni Carpio nga awan ngamin ti hurisdiksiyon iti international tribunal iti military activities.
Isutgapuna a risoten iti technical problem sakbay a mangidatag ti pagilian ti baro a kaso kontra China iti Permanent Court of Arbitration idiay The Hague, Netherlands.
Nupay mabalin a padasen ti China nga ipasardeng ti konstruksiyon ti civilian replacement para iti naisadsad a military outpost ti Pilipinas a BRP Sierra Madre idiay Ayungin shoal, imbaga ni Carpio a mabalin a dumatag ti Pilipinas iti tribunal ken irason a maysa daytoy a civilian activity.
Mabalin pay a kiddawen ti Pilipinas iti US nga agpa-eskort kadagiti resupply mission para iti tropa a Pilipino a naka-istasyon idiay Ayungin shoal ngem imbaga ni Carpio a saan pay a kasapolan daytoy iti agdama.
Inrekomenda pay ti sigud a Supreme Court Chief Justice a simpaen iti resupply mission kasaruno ti panangallokoy na kadagiti otoridad nga agusar iti napar-partak a resupply vessels, itultuloy iti panangi-pawil ti panagusar ti paltog ken komprontasyon, ken ipawil ti agimet ti natitirad nga armas tapno malik-likan ti tensiyon.
Kinunana pay a nasken nga idokumento dagiti kameng ti media iti resupply missions tapno malabanan iti posible a false claims ti China.
Insingasing pay ni Carpio a rumbeng a kiddawen ti Pilipinas ti diplomatiko a suporta manipud kadagiti kaalyado na a mangiruar ti statement kontra kadagiti aksiyon ti China.
Kabayatanna, imbaga pay ni Carpio a ti nagbalin nga addang ti pwersa ti China idiay Ayungin ket mailabsing iti international law agsipudta napasamak daytoy iti exclusive economic zone ti pagilian ken adda iti sovereign immunity ti pagilian, isunga saan a mabalin nga idatagan, arestaren wenno gam-gamen iti barko a panggubat ti pagilian iti lugar argaman iti auxiliary vessels.
