LA UNION – Naminsan manen a mapalagipan dagiti mannalon maipapan iti agraraira a linteg a mangipaw-pawil ti panangusar kadagiti kangrunaan a kalsada, partikular iti national highway, a pagbilagan iti anyaman a produkto iti talon, kas koma iti irik ken mais.
Lalaunen daytoy iti linteg a Presidential Decree No. 17 wenno Revised Philippine Highway Act.
Iti panangipatungpal ti P.D. 17 ket pagbinnuligan iti Department of Public Works and Highways (DPWH) ken Philippine National Police (PNP).
Siasinuman a mannalon a mapaneknekan a manglabsing iti nasao a linteg ket sumango iti pannusa a pannakaibalud iti saan a nasursurok ngem innem a bulan ken mamulta iti aganay P1,000.
