Kagiddan ti panagsubli ti eskuela iti panawen ti panagtutudo, palagip ti otoridad kadagiti estudiante a pategenda iti salun-at ken kinatalgedda babaen ti panagusar kadagiti Personal Protective Equipment (PPEs) tapno maliklikanda dagiti sakit ken peggad a maipataud ti tudo ken layos.
Segun kenni Gino Osvi P. Mabalot, Head ti Municipal Disaster Risk Reduction and Management Office (MDRRMO) iti ili ti San Juan, La Union, napateg a iprayoridad dagiti estudiante dagiti proteksion a kas ti payong, kapote, ken botas tapno maliklikan ti panakaala ti rugit ken sakit iti danum iti panawen ti layos.
Kinunana a saan laeng a dagiti ubing no di ket uray dagiti teenagers ken estudiante iti kolehio ti masapul a nakasagana iti epekto ti panagtutudo kabayatan ti panagadalda.
Malaksid iti panagusar kadagiti PPEs, pinalagipan met ni Mabalot dagiti estudiante a pabilegenda iti bagida babaen ti nasayaat a pannangan ken umno a panangtaripato ti salun-at. Kinunana a masapul ti naimbag a pannakasalun-at agsipud ta kasapulan ti bileg ken enerhia iti panagadal.
Pinakdaaranna met iti publiko a kanayon nga i-monitor dagiti weather forecast ti PAGASA ken dagiti dadduma pay nga ahensia ti gobierno, kasta met dagiti mapagtalkan a pakaammo maipanggep iti tiyempo. Karaman ditoy iti panang-monitor kadagiti mapagtalkan a source ti damag a kas iti Bombo Radyo tapno maammoan dagiti kabaruan a pakaammo ken pammagbaga.
Kinuna pay ni Mabalot a paseten ti biag dagiti Pilipino iti pannakapadas ti panagtudo, bagyo, ken layos kada tawen. Gapuna, napateg a maawatan ti tunggal maysa no kasano a mapataud dagitoy a peggad, no kasano a maliklikan dagiti epekto na, ken no kasano iti umno a panagsagana.
Kabayatanna, agtultuloy iti panangpalagip ti otoridad iti publiko a kanayon nga agannad ken agsagana tapno masiguro iti natalged ken naurnos a panagsubli ti eskwela iti daytoy a panawen ti panagtutudo. (Report by Bombo Jordan)
