LA UNION – Naklaat ken saan a ninamnama ti La Union Convention and Visitors Bureau (LUCVB) iti panagdopodop iti adu a turista, partikular idiay ili ti San Juan, La Union a pakasarakan iti Surfing Capital of the North.
Iti eksklusibo nga interview ti Bombo Radyo La Union kenni Tina Antonio, agdama a presidente ti LUCVB ken maysa a resort owner, ribu a turista iti nagturong iti nasao nga ili nangrugi pay idi Sabado, Nobyembre 11, kalpasan nga ideklara nga special non-working days iti November 13-15, gapu iti maisay-sayangkat nga ASEAN SUMMIT ditoy pagilian.
Kinuna ni Antonio nga uppat nga aldaw a fully booked iti amin a hotel ken beach resorts idiay ili ti San Juan isunga dagiti saan a na-akomodar a turista ket naiturong iti kabangibang nga ili ken ditoy syudad ti San Fernando.
Kinuna na a kaadwan a simmangpet a bakasyunista ket naggapo idiay Manila ken Baguio City.
Innayon na pay nga ita nga aldaw ti Miyerkoles ket ag-check out iti kaadwan kadagitoy kagiddan iti panagleppas ti ASEAN Summit, ken agsublin iti trabaho inton bigat, malaksid laeng kadagiti agad-adal.
