Sumango iti kaso a theft wenno panagtakawan ti uppat nga indibidual a nagtakaw ti kalding idiay Barangay Ortega, Bacnotan, La Union.
Daytoy ti kinuna ni PCI Reynaldo Soria, hepe ti Bacnotan Police Office kabayatan ti pannakiuman kenkuana.
Maipalagip, nakita ni Reynaldo Ganiola, 31, addaan asawa, dagiti suspek a da Joshua Espina, 20, John Danrei Manalang, 20, agpada a residente ti Brgy. Poblacion, Nhoel Jann Quinito, 18, ti Brgy. Baroro, ken ti 16 anyos a kaduada, ti panangalada ti masya a babae a kalding bayat a nakaluganda dagitoy iti motorsiklo.
Dagus met laeng a natiliw dagitoy ken naisubli iti makinkukua ti tinakawda a kalding nga agbalor ti P2,500.
Iti agdama, agtaltalinaed pay laeng iti pagbaludan dagiti suspek.
