Inlawlawag ni Justice Assistant Secretary ken Spokesperson Mico Clavano nga awan pay ti kumpirmasyon nu agpayso metlaeng a tulang ti tao dagiti narekobre ti Philippine National Police ken Philippine Coast Guard.
Paset paylaeng daitoy ti isaysayangkat a ‘search and retrieval operations’ dagiti otoridad iti imbutaktak ni Julie ‘Dondon’ Patidongan alias Totoy a paset ti Taal Lake a nangibellengan kadagiti “missing sabungeros”.
Kabayatanna, impatulod met ti ahensya dagiti kameng ti National Bureau of Investigation ken Piskal nga agserbi kas ‘witness’ iti nasao a search and retrieval operation.
Bayat nga awan pay iti kumpirmasyon nu tulang metlaeng ti tao dagiti narekobre a sako idiay Taal Lake, inbinglay met ni Atty. Clavano a posible a dumanon ti maysa agingga dua nga aldaw sakbay a mapasingkedan ti resulta babaen ti forensic examination.
