LA UNION – Naidataganen iti kaso dagiti suspek iti dua a nagsaruno nga insidente ti panagtakawan idiay syudad ti San Fernando, La Union.
Naammuan ti Bombo Radyo manipud iti San Fernando City Police, naidatagen idiay piskalya ti kaso a theft kontra kenni John Padilla wenno alyas JM ti Barangay Sevilla iti nasao a syudad a maipagarup a nangitaray ti naglakkuan iti mami.
Nabigbig ni Padilla gapu iti CCTV footages a naala manipud iti aglawlaw ti pasdek iti Mami King maipapan iti napasamak iti panagtakaw.
Kaso a robbery met ti naidatag iti piskalya kontra kenni Ruben Rivera ti Ilocanos Sur iti nasao a syudad.
Ni Rivera iti maipagarup a nangserrek ken nangitaray iti P25,000 cash ti maysa a houseware store iti syudad ti San Fernando.
Kabayatanna, nagpalagip met ti pulisya kadagiti umili nga agbalin a naridam ken naannad kontra kadagiti agtatakaw kangrunaan ita nga umadanin iti panawen ti Paskua.
