LA UNION – Ginundawayan dagiti turista manipud Manila iti pannakasuspinde ti serrek iti trabaho ken klase gapu iti naisayangkat a 31st ASEAN Summit ditoy pagilian.
Naaddaan ti gundaway dagiti turista a makapag-relax ken agpasyar iti nabirngasan a surfing capital of the north, iti ili a San Juan, La Union.
Iti eksklusibo nga interview ti Bombo Radyo La Union kenni PSI Chey Chey Saulog, agdama a hepe ti San Juan Police Station, kinuna na nga idi pay aldaw ti Sabado a nangrugi a dopodop dagiti turista ken immadu dagiti motorista iti masakupan da a lugar.
Gaputi dayta, nangipatungpal ti pulisiya iti nairut a panagbantay iti igid ti baybay, beach resorts and restaurants ken naimuntar dagiti otoridad kadagiti kangrunaan a kalsada, tapno ma-asistiran dagiti biyahero ken maliklikan iti nairut a trapiko.
Ita nga aldaw ti Miyerkoles, Nobyembre 15, kagiddan iti panagleppas ti ASEAN SUMMIT 2017, ket manamnama nga agsbulin dagiti turista nga agtrab-trabaho idiay Manila isunga agtaltalinaed a naka-alerto ken nakabantay dagiti otoridad iti kalsada tapno masiguro ti kinatalged dagiti motorista.
