Inaprobaran ni Department of Budget and Management (DBM) Secretary Amenah Pangandaman dagiti 16-K a baro nga teaching positions kadagiti public schools para ti School Year (SY) 2025–2026 kas sungbat ti direktiba ni Presidente Ferdinand Marcos Junior a papigsaen ti sektor ti edukasyon.
Dagiti kanayunan a 16-K a baro a posisyon ket paset ti first tranche ti target a 20-K teaching positions para ita a tawen. Kadaitoy a bilang, 15,343 ket ti Teacher I position nga addaan iti Salary Grade 11.
Dagiti teaching post para ti Senior High School ket maikabil ti division level para kadagiti flexible deployment, maiyannurot ti allagaden nga immunan nga inruar ti DBM idi tawen 2016.
Segun kenni Secretary Pangandaman, daitoy nga addang ket suporta para ti Department of Education (DepEd) tapno mapapigsa pay ti workforce iti Kindergarten, Elementary, Junior High School, Senior High School, ken ti Alternative Learning System (ALS).
Mapatta-patta a dumanon ti P4.194-B ti pondo a naitukon kadagiti baro a posisyon a nagtaud met iti built-in appropriations ti DepEd babaen ti 2025 General Appropriations Act.
Iti agdama a SY 2024–2025, impadamag ti DepEd a nasurok 27.012-M nga estudyante ti naka-enroll iti elementarya ken high school ti intero a pagilian, pakairamanen ti Alternative Learning System (ALS).
