Inyanunsyo ti Department of Budget and Management (DBM) nga agiddan a maawat dagiti empleyado ti gobyerno iti year-end bonus dagitoy ken iti P5,000 cash gift agraman ti umuna a suweldo da ita a bulan ti Nobyembre.
Nainget nga impalagip ti Department of Budget and Management iti amin nga ahensiya ti gobyerno a suruten dagiti naituding nga iskedyul a pannakaipalospos dagiti nasao a benepisyo.
Kinumpirma ti Department of Budget and Management idi kalman, Sabado, a nairuar dan iti P82.998 billion a pondo para iti Year-End Benefits dagiti kwalipikado a sibilyan, militar, ken uniformed personnels.
Nainget nga imbilin ti ahensya kadagiti maseknan nga opisina ti gobyerno a saan nga i-delay iti panagbayad babaen iti panangisina wenno maud-udi a payroll.
Maiyannurot iti Budget Circular No. 2024-3, dagiti kwalipikado a kameng ti gobyerno ket adda karbengan da nga umawat ti year-end bonus a kaibatugan ti maysa bulan a salary agingga Oktubre 31, 2026, agraman ti P5,000 cash gift.
Segun kenni Budget Secretary Kim Robert de Leon, naibunongen ti pondo kadagiti ahensya ket rumbeng a siguradwen a maawat dagiti empleyado dagiti nasao a benipisyo .
Impaganetget manen ti Department of Budget and Management a ti naipanawen a panangipalospos kadagiti nasao a benepisyo ket maysa nga obligasyon iti sidong ti maipatpatungpal a polisiya iti kompensasyon ti gobyerno.
Al-allokoyenna dagiti ahensya a sumurot iti naituding nga iskedyul a panagbayad.
Iti pakabuklan nga alokasyon, P73.449 billion ti nailatang para iti Year-End Bonus, bayat a P9.549 billion para iti cash gifts.
Dagiti maiparbeng nga umawat iti benepisyo, kasapolan a ti maysa a kameng ti gobyerno ket nakaipaay ti serbisyo ti saan a bumaba iti uppat a bulan wenno 120 nga aldaw manipud Enero 1 agingga Oktubre 31, 2026.
Kasapolan nga adda iti serbisyo ti gobyerno agingga Oktubre 31.
Sakopenna pay iti kasapolan nga eligibility dagiti empleyado a regular, contractual, wenno casual a posisyon, nasyunal man wenno lokal a gobyerno.
Kabilang pay ditoy dagiti nangaka iti awtorisado a leave of absence nga adda bayad na.
Inlawlawag ti Department of Budget and Management a ti pondo para kadagiti benepisyo ket sibubukel a nairuar kadagiti ahensya sipud pay idi rugi yi fiscal year 2026.
Nupay kasta, iti aktwal a petsa ti panagbayad ket nakadepende iti payroll schedule ti tunggal ahensya.
