Imbutaktak ni DILG Secretary Jonvic Remulla nga agrarairan ti ‘anti-epal guidelines’ iti sidong dagiti polisya ti Department of Budget and Management ken ti Office of the President, kagiddan ti dakdakkel nga akem dagiti LGUs iti panangidanon dagiti basic services ken probision nga anti-political iti 2026 General Appropriations Act.
Segun kenni Remulla, nainget a maiparparit iti panangikabil ti nagan, ladawan, wenno logo dagiti politiko kadagiti proyekto a pinondoan ti gobierno, ken dagiti laeng detalye kas iti nagan ti proyekto, petsa, kontratista, ken naggapuan ti pondo iti mabalin nga ikabil.
Inallukoy ti sekretario iti publiko nga i-report iti social media dagiti panaglabsing tapno dagos daytoy a maimbestigaran, nupay saan a dagos nga agtungpal iti panangikkat iti puesto, mabalin met a masuspendir dagiti karaman.
Malaksid ditoy ket mabalin pay nga ipasa iti Ombudsman iti kaso.
Sumango ti kaso nga administratibo dagiti pulitiko a saan a sumurot kadagiti guidelines ken probision.
Mamati isuna nga iti wagas tapno maaddaan ti ngipen iti Anti-Epal campaign ket rumbeng a mangaramid ti linteg dagiti mammanday-linteg.###
