BR LA UNION – Maipagarop a pinagkedkedan dagiti kongresista a pirmaan iti bersyon ti Senado nga i-institutionalize wenno aramiden a permanente iti Assistance to Individuals in Crisis Situations (AICS) gaputi probisyon a mangipawil kadagiti opisyal ti gobyerno a makipaset iti panagibunong ti ayuda.
Segun kenni Senate Committee on Social Justice Chairman Senator Erwin Tulfo, nadismaya agsipudta saan man laeng a natalantan ti nasao a gakat iti special session ti senadp.
Kinuna na a ti kangrunaan a makagapo ti delay ket iti panagkedked iti counterpart da idiay House of Representatives wenno kamara a pirmaan iti bicameral conference committee version ti bill.
Nairanta ti nasao a probisyon a maliklikan ti pannakausar ti ayuda iti “political patronage,” a nabayagen kunana nga isyu iti implementasyon ti programa.
Segun pay iti senador, nalawag iti nasao a probisyon a maipawil kadagiti nabotosan nga opisyal ken kameng ti gobyerno a direkta makipaset iti panagibunong ti tulong pinansyal manipud Department of Social Welfare and Development (DSWD).
Iti AICS ket maysa a programa ti DSWD nga addaan tarigagay nga ipaayan ti pinansyal a tulong dagiti indibidwal a makapaspasar ti krisis, kabilang iti panggastos medical ken dadduma pay a pang-emerhensiya a kasapolan.
Ni Tulfo ket sigud a lider ti ahensiya sakbay a nagbalin a senador.
Inlawlawag pay ti senador iti konsepto ti “epal,” a maysa a sarita a balbal a mangdak-dakamat kadagiti pulitiko a maipagarop a makipas-paset wenno agpapansin kadagiti aktibidad a saan met a kasapolan ti presensiya da.
Impaganetget pay ni Tulfo, saan a rumbeng a sumurot dagiti pulitiko iti distribusyon ti ayuda agsipudta naggapo iti pondo ti gobyerno ken rumbeng a DSWD laeng ti mangipatungpal.
Iti AICS bill ket kabilang kadagiti prayoridad a gakat ti administrasyon ni President Ferdinand Marcos Jr. nga addaan tarigagay nga aramiden a linteg ti programa ken siguradwen a regular tipondo para iti daytoy.
Gaputi saan pay laeng a panagti-tinnunos, manamnama a matalantan ti gakat iti bicameral conference committee tapno mapagnumwan ti bersyon ti Senado ken Kamara.
