BR LA UNION – Inaprubaran ti House Budget Amendments Review Sub-Committee ti House Committee on Appropriations iti realignment wenno panangiyakar ti ₱46 bilyon manipud iti proposed budget ti Department of Public Works and Highways (DPWH) para kadagiti flood control projects inton 2026, agturong iti dua a kangrunaan a social amelioration programs ti gobyerno.
Segun iti Budget Amendments Review Subcommittee, kinanunungan da iti singasing ni House Minority Leader ken 4Ps party-list Rep. Marcelino Libanan nga iyakar ti aganay ₱32.6 bilyon iti Assistance to Individuals in Crisis Situations (AICS) ti Department of Social Welfare and Development (DSWD), ken ₱14.82 bilyon iti Tulong Panghanapbuhay sa Ating Disadvantaged/Displaced Workers (TUPAD) ti Department of Labor and Employment (DOLE).
Iti realignment ket kasaruno iti waragawag ni President Ferdinand “Bongbong” Marcos Jr. nga awan ti baro a pondo a mailatang iti flood control projects inton 2026.
Iti sidong ti gakat a ₱6.7-trilyon national budget, nasurok a ₱250 bilyon iti orihinal a mailatang para iti flood control iti sidong ti DPWH.
Maiyakar ti dakkel a paset ti singasing a pondo kadagiti programa a direkta a makatulong kadagiti nakurapay ken displaced workers.
Iti AICS program ket panangipaay ti tulong pinansyal para kadagiti indibidwal nga adda iti emergency situations, kas iti panagsakit, aksidente, wenno kalamidad bayat a ti TUPAD ket emergency employment program para kadagiti napukawan ti trabaho wenno adda iti informal sector.
