BR LA UNION – Inbinglay ni Cardinal Pablo Virgilio David ti opisyal a datos manipud iti 2025 General Appropriations Act (GAA) a mangipakpakita iti gatad ti pondo a nailatang para kadagiti mammanday-linteg ti pagilian.
Segun kenkuana, tunggal senador ket addaan iti tinawen a badyet a P580.42 milyon, a no maibinglay kadagiti 24 a senador ket umabot iti agarup P13.93 bilyon para iti Senado iti makatawen. Kaibatugan daytoy ti agarup P48.37 milyon iti kada bulan wenno P1.61 milyon iti kada aldaw tunggal senador.
Kabayatanna, tunggal kongresista ket nailatangan ti P106.53 milyon iti kada tawen.
Iti pakabuklan a 316 a kameng ti Kamara, umabot daytoy iti P33.67 bilyon ti pondo para iti House of Representatives.
Kaibatugan daytoy ti P8.88 milyon kada bulan wenno P292,598 ti kada aldaw tunggal kongresista.
Iti pakabuklan, umabot iti P47.6 bilyon ti opisyal a badyet para iti lehislatura idi 2025.
Kinuna ni Cardinal David a saan pay a karaman ditoy dagiti makunkuna a “commissions” wenno kickbacks manipud kadagiti proyekto, kasta met dagiti pondo manipud kadagiti unprogrammed appropriations ken patronage funds a dumaldalan iti ayuda programs kas iti MAIFIP, TUPAD, AICS, ken AKAP.
Impaganetget ti Cardinal nga agtal-talinaed a nadagsen a saludsod no kasatno a maus-usar ti nasao a dakkel a gatad, idinto nga agtultuloy met latta a malay-layos dagiti silid-pagadalan ditoy pagilian, kurang latta ti katre kadagiti ospital, mailomlom-lom iti utang dagiti mannalon, ken agbibiag met latta a napa-panglaw dagiti mangmangged.
Kinunana a ti P47.6 billion para kadagiti lehislador, uray sakbay pay a nairaman iti patronage ken commissions, ket saan laeng a moral issue daytoy ngem ketdi national issue.
