BR LA UNION – Inaprubaran ti Department of Budget and Management (DBM) iti pannakai-release ti 3.39 bilyon para iti (FY) 2023 Performance-Based Bonus (PBB) dagiti 225,545 a kwalipikado nga opisyal ken kameng ti Philippine National Police (PNP).
Segun kenni Budget Secretary Amenah Pangandaman, paset daytoy iti direktiba ni President Ferdinand Marcos, Jr. a papigsaen iti morale ken pagsayaatan dagiti mangmangged ti gobyerno, nangruna dagiti mangipatpatungpal ti linteg.
Nairanta daytoy tapno ipakita iti nasaknap a tarigagay ti administrasyon a maaddaan ti propesyonal, nasaranta, ken suportado a burukrasya nga agtrab-trabaho nga addaan ti integridad ken kredibilidad.
Iti sidong ti naaprubaran a pondo, tunggal kwalipikado nga opisyal ken kameng ti PNP ket makaawat ti Performance-Based Bonus a kaibatugan ti 45.5% iti binulan a basic salary, maibasar iti suweldo da idi Disyembre 31, 2023.
Agtaud ti pondo iti Miscellaneous Personnel Benefits Fund (MPBF) iti sidong ti Republic Act No. 12116 wenno Fiscal Year 2025 General Appropriations Act (GAA).
