Inladawan ni House Senior Deputy Minority Leader Leila de Lima a kas maysa a kita ti pammutbuteng ti panangipila ni Davao City Rep. Paolo “Pulong” Duterte ti cyber libel ken libel charges kontra iti sumagmamano a kameng ti media ditoy pagilian.
Iti maysa a statement, kinondenar ni De Lima ti nasao nga addang, a kunana a mabalin a mausar a manglapped iti nawaya a prensa ken pannakaipaay ti impormasion iti publiko.
Mainaig iti nasao a kaso iti alegasion nga imbutaktak ti naikkat a pulis a ni Rodulfo Gracioso Jr. a nangkuna a nangitulod daytoy kadagiti maleta a mapapati a naglaon iti kuarta iti pamilya Duterte.
Impaganetget pay ni De Lima a ti pannakaipila ti kaso ti libel kontra iti maysa a media network ket mabalin a maibilang a pressure iti kinawayawaya ti journalism, nangruna iti panangireport kadagiti alegasion maipapan iti korapsiyon iti pagilian.
Impaganetget ni De Lima nga imbes a dagus a mangipila iti darum, sungbatan koma dagiti maseknan dagiti alegasion ken mangipaay iti panangilawlawag kadagiti saludsod ti media, kas paset ti pagrebbenganda iti publiko.
