Dumanonen iti 221 ti bilang dagiti pimmusay iti narsuod a bubong ti maysa a nightclub idiay Dominican Republic idi Martes, Abril 8, 2025, malaksid pay dagiti nasurok 500 a nadundunor.
Segun kadagiti opisyal, dumanon ti 500 agingga sangaribo a tattao ti adda iti uneg ti club idi narsuod ti bubong na kabayatan ti panagtugtog ti nalatak a kumakanta a ni Rubby Pérez, a natay metlaeng gapo iti insidente bayat a nakalasat met iti anak na.
Pormalen a nalapas ti rescue operations idi Miyerkules ti rabii ken ita ket nakapamaysa dagiti otoridad iti panangrekobre kadagiti bangkay ken panangdakamat dagiti pakabigbigan da.
Karaman kadagiti natay ket ti gobernador ti Monte Cristi a ni Nelsy Cruz ken sigud nga MLB players nga isuda Octavio Dotel ken Tony Blanco. Adda pay dagiti gangganaet a natupakan manipud met Haiti, Italy, France, ken Estados Unidos.
Kabayatanna, naiyanunsyo ti tallo nga aldaw a national mourning para kadagiti biktima.
Nangipadanon met ti panakiladingit da dagiti Hollywood star Zoe Saldaña ken Cardi B babaen ti social media.
Iti sabali a bangir, nagkeddeng ti gobierno ti Dominican Republic a mangisayangkat da ti imbestigasyon karaman dagiti local ken international experts tapno madakamat iti rason ti napasamak.
