BR LA UNION – Insukon ti Department of Public Works and Highways (DPWH) idiay Office of the Ombudsman ti amin a computer ken files nga inusar ni sigud a DPWH Undersecretary Maria Catalina Cabral, kas panagtungpal iti Subpoena Duces Tecum wenno subpoena ti Ombudsman nga agsumite kadagiti dokumento wenno ebidensiya.
Segun iti DPWH, dagiti naisubmitir a dokumento ket pakairamanan dagiti rekord ken request for consideration seknan ti programming ti National Expenditure Program (NEP) iti napalabas a sangapulo a tawen.
Dagitoy ket insuko ti sumagmamano nga undersecretaries ti DPWH ken dagus nga in-selyado ti Ombudsman para iti digital forensic examination.
Kinuna ni Assistant Ombudsman Mico Clavano nga agtalinaed a selyado dagiti alikamen bayat ti pannakaisayangkat ti eksaminasyon.
Kinunana nga interesado pay ti Ombudsman a maala iti cellphone ni Cabral, nupay daytoy ket sakop ti imbestigasyon ti Philippine National Police (PNP).
Naduktalan ni Cabral nga awan puotna idi Disyembre 18 idiay Tuba, Benguet ken naideklara a natay iti kabigatanna.
Bayat nga adda iti indikasyon a posible a nagpakamatay, impaganetget ti PNP nga agtultuloy pay laeng ti imbestigasyon.
Nagikkat ni Cabral idi Setyembre kalpasan ti alegasyon kontra kenkuana mainaig kadagiti anomalya iti flood control projects.
