BR LA UNION – Nakaawat ti Department of Education (DepEd) Election Command Center ti pakabuklan a 160 a report manipud naduma-duma a field offices agingga itay ala 1:30 ti malem ita nga aldaw ti eleksiyon, May 12, 2025.
Kaadwan kadagiti report ket adda pakainaiganna iti problema dagiti Automated Counting Machines (ACM), mapukpukaw a nagan iti listaan dagiti botante, ken isyu pangsalun-at dagiti mangisursuro ken personnel ti DepEd a nagserbi nga election workers.
Segun iti DepEd, dagus a nasungbatan dagiti insidente iti tulong ti COMELEC, Philippine National Police (PNP), ken dadduma pay a kabinnulig nga ahensya tapno masiguro iti naannayas, natalged ken napudno nga eleksiyon.
Kas sungbat iti direktiba ni Education Secretary Sonny Angara, agtultuloy iti koordinasyon ti DepEd Task Force, iti panangidaulo ni Usec. Malcolm Garma, kadwa iti Regional ken Division Election Task Force teams tapno siguradwen iti napartak nga aksyon iti anyaman nga insidente a makaapekto iti pagimbagan dagiti mangisursuro.
