Ninagananen ti Department of Education (DepEd) dagiti 14 a pagadalan a napili para iti pilot run ti Senior High School (SHS) work immersion program.
Panggep iti programa a mapasayaat pay ti kabaelan nga agtrabaho dagiti agturpos ti K-12.
Babaen ti DepEd Memorandum 052, uppat a pagadalan idiay Metro Manila ti karaman iti pilot implementation, tallo idiay Region 4-A, ken tiggaysa manipud Regions 1, 3, 4-B, 5, 7, Cordillera Administrative Region, ken Region 11.
Naisayangkat ti pilot run idiay Rajah Soliman High School and Science and Technology High School idiay Manila, Rizal High School idiay Pasig, Malanday National High School idiay Marikina, ken Tunasan National High School idiay Muntinlupa.
Napili met ti San Nicolas National High School idiay Ilocos Norte, Angeles City National Trade School idiay Pampanga, Tanza National Trade School idiay Cavite, Mamatid Senior High School idiay Cabuyao City, ken Santo Tomas National High School idiay Batangas.
Napili met ti San Jose National High School idiay Occidental Mindoro, ken Ligao National High School idiay Albay para ti Bicol region, Mandaue City Comprehensive National High School idiay Cebu, Baguio City National High School idiay Cordillera Administrative Region, ken Davao City National High School idiay Davao City.
Inlawawag ni DepEd Secretary Sonny Angara a maibasar iti guidelines a saan a sakop ti pilot program dagiti saan a nadakamat a SHS institutions.
Kabayatanna, marugian met ti implementasyon ti enhanced immersion guidelines ita a school year 2025-2026 nga agtultuloy agingga SY 2026-2027.
Daitoy a programa ket kas sungbat iti report ti Philippine Institute for Development Studies idi tawen 2021 ken 2024 nga adu nga employers ti saan nga ikonkonsidera dagiti nagturpos ti SHS kas “work-ready”.
Kas sungbat ket pinasayaat pay ti DepEd ti employability dagiti SHS graduates babaen kadagiti competency-based trainings a maiyannatop kadagiti standards ti industriya ken panangipaay kadagiti certifications kas rekomendasyon ti labor market studies.
