BR LA UNION – Nangipatungpal ti deployment ban iti Department of Migrant workers (DMW) kadagiti baro a Filipino workers nga agturong idiay Isarel, Iran ken Jordan.
Daytoy ket iti tengnga ti agtultuloy a tensiyon idiay Middle East.
Iti maysa a presscon, kinumpirma ni Migrant Workers Sec. Hans Leo Cacdac iti panangipawil kadagiti baro a mangmangged a Pilipino nga agturong iti nasao a pagilian bayat a mapalubosan dagiti returning overseas Filipino workers, ngem saan da pay a mabalin nga agbiyahe iti agdama, agsipudta nakarikep pay laeng iti airspace sadiay.
Nag-isyu pay ti DMW iti Advisory No. 19 series of 2025 para iti restriksiyon ti deployment dagiti OFWs idiay Israel, Iran, Jordan ken Lebanon.
Inabiswan pay ti sekretaryo dagiti OFW nga agturong idiay Jordan nga itantan pay laeng ti biyahe da nga agturong iti pagilian, agsipudta addaan daytoy ti common border iti Israel.
Kasta metten dagiti recruitment agencies ket naabiswan a saan pay laeng nga agpatulod ti filipino workers idiay Jordan.
Idiay met Israel, maipat-patungpal ti deployment ban sipud timpuar ti October 7 attack ti Hamas idiay Israel idi 2023.
Kabayatanna, nagballaagt iti sekretaryo a pagsungbaten da dagiti recruitment agencies a saan nga agtungpal iti deployment ban.
