Nakasaganan ti P1 billion a pondo ti gobierno a maited a tulong kadagiti Filipino TNTs wenno dagiti nabirngasan a ‘tago ng tago’ sadiay Amerika no bilang karaman dagitoy kadagiti maipadeport kas maibasar iti pammilin ni US President Donald Trump a crackdown kadagiti illegal immigrants.
Daytoy ti inwaragawag ni Department of Foreign Affairs (DFA) Undersecretary Eduardo Jose de Vega kalpasan ti nainget nga immigration policy ni Trump.
Segun kenni De Vega, mangipaay ti DFA iti tulong kadagiti Pilipino nga umasideg iti Philippine Embassy wenno US Consulates.
Imbalakadna pay kadagiti awan dokumentoda ken overstayed Filipinos idiay America a mangtaginayon iti low profile bayat ti panagasikaso da iti legal a wagas a panagtalinaed da idiay US.
Impaganetget met ni De Vega a nakasaganan ti gobierno ti Pilipinas a sumungbat no adda man iti mass deportation.
Adda dagiti pondo a kas iti DFA Assistance-to-Nationals Fund ken Action Fund ti Department of Migrant Workers (DMW) a mangipaay iti legal, medikal, pinansial, ken dadduma pay a tulong, kasta met ti panagawid ken proteksion kadagiti karbengan dagiti umili a Pilipino a maipit iti nasaknap a polisiya.
