BR LA UNION – Nagpanawagan ti Digital Pinoys ti imbestigasyon iti mapapati a saan nga otorisado a panangala dagiti dokumento manipud iti Department of Public Works and Highways (DPWH).
Segun kenni Digital Pinoys National Campaigner Ronald Gustilo, makapadanag ti report mainaig iti panagkopya ken panangikkat kadagiti file ni Rep. Leandro Leviste manipud iti opisina ni sigud nga Undersecretary Catalina Cabral.
Kinunana a dagiti files ti gobyerno ket addaan iti nalawag a sistema ti panangaywan ken panagsungbat a saan koma a matagi-awan.
Kinunana a ti laban kontra korapsyon ket rumbeng a mangpapigsa kadagiti institusyon ken saan a pakaigapuan ti pannakadadael.
Innayonna a no maikompromiso ti pamay-an ti pananggun-od iti ebidensiya, mabalin a mapukaw ti validity daytoy iti legal a proseso.
Inulit ti Digital Pinoys a masapul a maitandudo ti transparency ken accountability iti uneg ti linteg ken due process.
Maipalagip nga immunan nga inbutaktak ni Leviste nga iggem na ti inawaganna a “Cabral files” a maipagarop a naglaun iti listaan dagiti proponent iti na-anomalyaan a flood control projects a pakairam-ramanan ti sumagmamano nga opisyal ti gobyerno.
Rimwar pay ti report manipud iti maysa a DPWH staff a pwersado nga innala ni Leviste dagiti dokumento ken kinopya iti files manipud iti computer ni Cabral ken inyakar na iti bukod na a flash drive, banag nga immunan a pinaglibakan ti mammanday linteg.
