Nakailista ti Department of Interior and Local Government (DILG) ti pakabuklan a 16 a reklamo manipud iti publiko seknan ti pananggunaway dagiti dadduma a kandidato iti panangaramat ti programa ti Department of Social Welfare and Development (DSWD).
Maibasar ti datos ket sumamamano nga insidente iti panangiwaras ti ayuda, partikular babaen programa nga Ayuda para sa mga Kapos ang Kita Program wenno AKAP ken Assistance to Individuals in Crisis Situation wenno AICS ti naireklamo iti ahensya.
Ti nagbalin a sistema ket us-usaren dagiti dadduma a politiko nga agkankandidato ita nga eleksyon dagitoy a programa tapno magatang ti botos iti publiko ken ikonkonektar da iti nagan da iti distribusyon tapno pagparangen a naggapo kadakuada dagiti financial assistance a maaw-awat dagiti benepisyaryo.
Kabayatanna, nainget a maiparit ti kastoy nga aramid ken ti pananggundaway ti kapada a programa ti dadduma pay nga ahensya a nailaksid ti public spending ban ita nga eleksyon.
Gapo iti daitoy ket mapatulodan ti show cause orders dagiti 16 a kandidato nga karaman iti mapapati a vote-buying tapno depensaan iti bagbagi da.
Apaman mapaneknekan a pudno dagiti alegasyon ket agbalin a rason daitoy para iti disqualification ti kandidato.
Kabayatanna, agtultuloy met a nakamonitor ti liderato ti DILG ken aktibo da a nakabantay kadagiti reklamo agingga kadagiti sumaganad nga aldaw.
Maparegta iti publiko nga ipakaammo iti Commission on Elections (Comelec) nu adda iti mapaliiw a kapada nga insidente tapno dinagos a maresolbar ken mapaglawlawag dagiti karaman iti vote-buying para metten iti nadalus ken patas nga eleksyon.
